BACOLOD CITY – Nalipay ang anay pinuno sang Department of Environment and Natural Resources (DENR) sa paandam ni Presidente Rodrigo Duterte sa mga mining companies nga suno sa iya amo ang responsable sa pagkaguba sang palibot kaangay sang nagakatabo sa Mindanao.
Sa State of the Nation Address (SONA) ni Duterte sang Lunes sang hapon, ginpahayag sini nga dapat i-restore sang mga minahan ang virginity sang source nga ila ginaguba bangud kun indi, pagapatungan sila sang mataas nga buwis.
Sa exclusive interview sang Bombo Radyo Bacolod kay Gina Lopez, nagpasalamat ini sa statement sang presidente.
Ginpaambit sini ang nangin eksperyensya sang ila ginbisita ang Surigao del Sur, ang mining capital sang Pilipinas, kun sa diin nakit-an sang mga staff sang DENR ang malala nga epekto sang pagmina sa palangabuhian sang mga residente.
Suno diri, indi ang illegal mining kundi ang large-scale mining ang nagahalit sa mga mangunguma nga nagapalibot sa mga minahan rason nga husto ang presidente sa iya paandam sa mga kumpaniya nga ginapabay-an nga wala sang makaon ang mga residente.
Gindayaw ni Lopez ang kaisog sang presidente kag adbokasiya para sa mga pigado rason nga ginsuportahan niya ini sadto matapos na-appoint bilang pinuno sang DENR apang wala nadayon matapos ginbasura sang Commission on Appointments ang iya nga confirmation.
Subong nga wala na sa gobyerno si Lopez, gintukod sini ang I Love organization nga nagabulig sa mga Pilipino pinaagi sa green economy.
