Nagpalab-ot sang pagpakig-unong sa nalisdan nga pamilya sang mga biktima sang ramming attack sa Vancouver ang mga Filipino American singers nga sanday Apl.de.ap kag J. Rey Soul nga nagperform sa Filipino event nga Lapu-Lapu Day festival antes natabo ang masubo nga trahedya.
Sa isa ka statement sa iya Instagram account, ginpahayag sang Fil-Am rapper kag singer kag founding member sang Black eyed peas nga si Apl.de.ap nga nagapakig-unong siya sa mga biktima, ila nga pamilya kag sa tanan nga apektado sang trahediya sa Lapu-Lapu festival.
Suno diri, wala lamang dugay nga natapos sila sa pagperform sa nasambit nga festival kag nakahalin sa stage pila ka minutos lamang antes matabo ang trahedya.
Indi man sini mapaathag ang kakibot kag bug-at nga ila nga nabatyagan sa natabo.
Ginpasalamatan man nila ang ila nga mga fans nga ginkamusta ang ila nga kahimtangan kag nagpanawagan man ini nga pangamuyuan ang mga biktima, ila nga mga pamilya kag organizers sa nasambit nga event nga nagakihanglan sa karun sang pagpalangga kag kusog.
