Ginkumpirmar sang Bacolod Local Government Unit (LGU) nga negatibo sa Escherichia coli (E. coli) ang foreign object nga gina-alegar nakita sang isa ka empleyado sang Business Permit and Licensing Office (BPLO) sa arroz caldo nga ginpakaon sa Bacolod City Government Center.
Sa interview sang Bombo Radyo kay Bacolod City Administrator Atty Mark Steven Mayo, ginkumpirmar mismo ni Bacolod City Councilor Wilson Gamboa nga negatibo ang resulta sa e coli sang amo nga foreign object.
Suno kay Mayo, base sa pahayag sang empleyado nga nagreklamo, ginkuha sini ang foreign object nga nakita sa arroz caldo kag ginpusa kag ginsimhutan.
Suno diri, didto nila napanimahuan nga may ara sang malain nga baho sa amo nga foreign object.
Madumduman nga gilayon ginsugo ni Gamboa ang isa niya ka staff nga magpadulong sa Bacolod City Health Office agud nga mahibaluan kun ano ang nakita nga yara sa arroz caldo kag ginpadala para sa laboratory test.
Suno kay Atty Mayo, wala naman sang may nareport nga may medical emergency sa pila ka mga nakakaon sang arroz caldo.
Tuman ang pagpasalamat ni Bacolod City Councilor Wilson “Jun” Gamboa Jr. nga negatibo sa e coli ang foreign object nga nakita sa arroz caldo.
Suno kay Gamboa, tatlo ka adlaw nga wala ini nakatulog sang maayu matapos ang amo nga isyu.
Suno diri, tuman ang iya pangamuyo nga mangin negatibo ang resulta bangud luwas nga isa siya ka public servant, ginapromote man sini ang public safety kag public health.
Pahayag sini, sa masobra 25 ka tuig nga pagpanghatag sini sang arroz caldo sa mga tawo, amo ini ang una nga kahigayunan nga may ara sang nagreklamo.
Apisar sini, padayon sa gihapon siya nga magapanghatag sang arroz caldo bangud dako na ini nga bulig bilang ‘pantawid gutom’ sa mga empleyado kag mga tawo nga nagaproseso sang permit sa sulod sang Bacolod City Government Center (BCGC).
Dugang pa, paagi man sini mahatagan siya sang kahigayunan nga maka-upod sa mga tawo.
Pahayag sini nga wiling siya nga makig-angot sa City Administrator Office agud nga matsekyar sang sanitation team antes pa man ipanghatag ang arroz caldo.
