Gindeklarar na nga fire out ang nagluntad nga forest fire sa Mt Kanlaon sa bahin sang Barangay Bi-ak na Bato, banwa sang La Castellana, Negros Occidental sang Huwebes.
Sa interview sang Bombo Radyo Bacolod kay Engineer Joan Nathaniel Gerangaya, officer-in-charge sang Provincial Environment and Natural Resources sang Negros Occidental, nagdangat sa 35 hectares ang grass land nga nasunog.
Suno diri, gindeklarar sang Biyernes nga fire out na apang padayon ang pagmonitor sa area sa posibilidad nga magluntad sa liwat ang sunog.
Nagapati naman ini nga posible nga may nakalabay sa area nga nakahaboy sang upos sang sigarilyo ukon may nagpanutod, nga amo ang ginhalinan sang sunog.
Madasig nga naglapta ang kalayo bangod sa makusog nga huyp sang hangin kag tuman ka init nga tiyempo.
Nangin bulig naman sa ila ang pag-ulan nga nagpahagan-hagan sa paglapad sang sunog.
Samtang, nagpasalig naman ini nga pagabalikan nila ang area sa Lunes agud magpatigayon sang actual check.
Ginapasalamatan naman sini nga ang pag ulu-aligmat sang Local Government Unit sa pagbantay sa Mt Kanlaon, apang naintindihan man sini nga bisan may yara sang nagabantay, indi man mahimo nga mabantayan ang area 24/7.
