Ginpahayag sang anay tiglikom sa Department of Health nga sarang makabid internally ang ahensya kag indi na kinahanglan ipaagi sa separado nga kompanya.
Ini may kaangtanan sa Pharmally issue kun sa diin nagrekomendar sang graft charges ang Office of the Ombudsman batok sa mga opisyales sang Pharmally, Procurement Service-Department of Budget and Management (PS-DBM) kasubong man former Health Secretary Francisco Duque III.
Sa interview sang Bombo Radyo Bacolod kay Iloilo first district Congresswoman Dr. Janette Garin, nakibot ini sang nahibaluan ang tuman ka dako nga pondo nga ginsaylo sa PS-DBM para sa procurement sang medical supplies sa kasagsagan sang COVID-19 pandemic.
Paathag sini nga ang DOH ang may opisina sa 13 ka Rehiyon, may-ara sang 81 ka mga ospital kag may lima ka bids and award committee.
Kun ang mga ini ang hugpungon, nagapati si Garin nga sarang na nga makapatigayon sang internal bidding.
Aminado ini nga ang PS-DBM ang anad sa procurement bangod sila ang nagabakal sang mga office supplies sang kalabanan nga mga ahensya sang gobyerno, apang kun medical supplies ang pagabaklon, ang may expertise amo ang DOH.
Paathag sini nga may historical data ang DOH gani sila ang mas nakahibalo sang kalidad kasubong presyo sang pagabaklon, gani natingala ini kun ngaa nagsugot si former Health Secretary Duque nga masaylo ang tuman ka dako nga pondo.
Aminado ini nga nagasaylo man sang dako nga pondo ang DOH sa United Nations International Children’s Emergency Fund (UNIFEC) agud makanegosyar sa iban nga pungsod sang mga bulong, apang ang mga ini ang may technical expertise.
