Nagtaliwan na kahapon ang anay Speaker sang House of Representatives nga si Jose de Venecia Jr. sa edad nga 89.
Sa anunsyo sang iya pamilya, igapagwa man nila gilayon ang mga detalye nahanungod sa lubong.
Nag-post man sa Facebook si Pangasinan Representative Gina de Venecia sang litrato sang iya bana upod ang petsa sang iya pagkatawo nga Disyembre 26, 1935 kag ang petsa sang iya kamatayon.
Nagserbisyo si De Venecia bilang miyembro sang Kamara sang pito ka termino kag ginrepresentar ang probinsya sang Pangasinan.
Madumduman nga lima ka beses nga nagserbe nga House Speaker si De Venecia.
Pila sa mga hinimuan sini sa sulod sang iya nga termino ang Dollar Remittance Program, Bases Conversion and Development Act, Build-Operate-Transfer Law, Philippine Economic Zone Act, kag New Central Bank Act, kag iban pa.
Nagpakig-unong man ang presidente sang Lakas-Christian Muslim Democrats (Lakas-CMD) kag anay House Speaker nga si Martin Romualdez sa iya kaalyado nga isa sa malawig na nga haligi sang partido.
Ginlaragway niya si De Venecia bilang isa ka tawo nga may kaalam, kaisog, kag kaluoy, kag may dako nga ginbulig sa paghulma sang pungsod.
