Nadakpan sa drug buybust operation sa Purok Langis, Barangay Banago, Bacolod City ang gina-alegar isa sa suspect sa pagpangluthang sang 2022 ukon 2023.
Sa interview sang Bombo Radyo Bacolod kay Police Captain Rondyl Tapang, station commander sang Bacolod Police Station 3, ang subject person ang ginkilala nga si John Jeric Mochacho, street level individual, may live-in partner, wala sang trabaho, kag residente sa lugar.
Nakuha sa iya paghinakop ang 12 ka sachet sang suspected shabu kalakip na ang buybust item.
Ang suspected shabu ang ginabanta nagabug-at sang 3.7 grams kag may standard drug price nga P31,450.
Suno kay Tapang, sa inisyal nga imbestigasyon naggwa nga si Mochacho ang isa sa suspect sa shooting incident nga natabo sang 2022 ukon 2023 apang wala gidpadayun ang pagfile sang kaso gani ini ang wala mapriso.
Ang report ang ila pa sa karun nga ivalidate, apang sa ila intelligence monitoring positibo nga engaged sa illegal drug activities ang suspect.
Panawagan man ni Tapang sa mga pumuluyo nga sila ang buligan sa kampanya batok sa illegal nga droga kag ireport kun may illegal drug activities sa inyo lugar.
Bangod pinaagi sa pagdakop sa mga durugista malayo nga mabiktima ang mga kabataan sa palaabuton.
