Gina-alegar nga vintage bomb ang nakita sang isa ka mangunguma sang Abril 11 sang hapon sa Hacienda Puso, Barangay Burgos, Cadiz City.
Sa interview sang Bombo Radyo Bacolod kay Police Lt. Lovella Cordova, Deputy Chief of Police sang Cadiz City Police Station, ang bomba ang nakita sang caretaker sang isa ka uma sa nasambit nga lugar sang Abril 11 apang ginreport sang Abril 12 paagi sa pagtawag sa mga kapulisan sang Cadiz sang Punong Barangay sang Barangay Burgos sa nasambit nga ciudad.
Nasapwan ang ginaalegar nga vintage bomb sang ang caretaker sang uma ang nag-arado gamit ang plow tractor kun sa diin ang rastilyo sang tractora ang nakabunggo sa metal object kag sang gintsekyar isa ka gina-alegar nga vintage bomb.
Sang nabaton sang Cadiz City Police Station ang report ang duha ka imbestigador kaupod ang Mobile Patrol Unit kag nagkoordinar man ang mga ini sa Explosive Ordnance Division sang Negros Occidental Police Provincial Office (NOCPPO).
Ang nasambit nga bomba ang yara na sa karun sa paghinakop sang EOD.
