Ginalantaw sang Guihulngan City Police Station nga ang mag-utod mismo nga Bayawa ang target sang armado nga mga lalaki nga nagsulod sa ila balay sa Barangay Hibaiyo, Huwebes sang kaagahon.
Sa interview sang Bombo Radyo Bacolod sa case investigator nga si Police Executive Master Sergeant Jerome Delara, ginpahayag sini nga mahimo wala natrangkahan ang gate sang pamilya Bayawa kagab-i gani nakasulod ang mga suspetsado.
Ila nga ginguba ang padlock sa main door sang balay kag ila naabtan ang caretaker sa ground floor.
Ginhold sang iban nga suspetsado ang caretaker samtang ang iban nga armed men ang nagsaka sa second floor sang balay sa diin nagatulog ang mag-utod nga Aradale Bayawa, chief sang Curriculum Implementation Division sang DepEd Division of Guihulngan City; kag Arthur Bayawa, assistant principal sang Guihulngan National High School – Special Science Department.
Suno kay Delara, atubangay lamang ang hulot sang mag-utod nga lunsay single.
Si Aradale ang gintiro sang mga suspetsado sa nawong gamit ang .9mm caliber pistol samtang sa ulo man gintiro si Arthur.
Narekober sa crime scene ang mga empty shells sang M14, M16 kag .9mm caliber pistol.
Suno sa mga tupad-balay sang mag-utod nga Bayawa, van ang ginsakyan sang mga suspetsado bilang getaway vehicle.
Nagpadulong ang mga ini sa norte nga bahin sang Guihulngan City.
Suno sa imbestigador, ginalantaw nila ang personal nga anggulo, may kaangtanan sa trabaho ukon may kontra ang mga biktima nga amo ang nagpapatay sa ila.
Paga-usisaon man kun may nadula sa kagamitan sang mag-utod.
Suno kay Delara, wala man ginkuha sang mga suspetsado ang importante nga papeles nga natago sa Montero nga salakyan sang mga biktima nga yara sa garahe.
