Nakahimo sang maragtas si the “Golden Boy” Carlos Yulo matapos nakuha ang ikaduha sini nga gold sa vault finals sang men’s artistic gymnastics kagab-i sa Bercy Arena.
Ini matapos una sini nga nakuha ang gold sa floor exercise para sa labing una nga medalya sang Pilipina sa Summer Games sang Sabado.
Bangud sa kadalag-an sini sa vault, sigurado na nga nalapawan subong nga tuig ang performance sang pungsod sa Tokyo sang 2021 kun sa diin si Hidilyn Diaz ang nakapauli sang labing una nga gold medal sang Pilipinas.
Ang dynamic Filipino gymnast ang nakascore sang 15.116 sa duha ka vaults sini sa finals kun sa diin nalampuwasan sini ang difficulty level sa una nga attempt.
Bilang isa ka anay world champion, una nga ginperform ni Yulo ang isa ka Ri Se Gwang para sa score nga 15.433 kag isa ka Kasamatsu double twist para sa score nga 14.800.
Nalapawan sini si Harry Hepworth sang Great Britain nga ikaduha nga nagperform kag nakakuha sang 14.949.
Si Yulo ang nangin ikaapat nga Filipino athlete nga nakadaog sang multiple Olympic medals kaupod sanday Teófilo Yldefonso sa swimming nga nakakuha sang duha ka bronze sa 1928 Amsterdam kag 1932 Los Angeles; Hidilyn Diaz nga isa ka silver medalist sa Rio antes sini nakuha ang bulawan sa Tokyo; kag Nesthy Petecio nga nakasecure na sang bronze sa Paris matapos nakapauli sang silver sa Tokyo sang 2020.
