Ginpahayag naman ni Negros Occidental Governor Eugenio Jose ‘Bong’ Lacson nga ang Western Visayas Regional Athletics Association (WVRAA) 2024 ang isa ka palaagyan agud nga makadiskubre sang bag-o nga mga talento.
Sa mensahe ni Lacson, ang nasambit nga paindis-indis ang nagahatag sang kahigayunan sa mga atleta agud nga makacompete sa mas dako nga national stage.
Dugang pa sang gobernador nga ang nagaseparar lamang sa mga atleta gikan sa paglab-ot sang ila mga handom amo ang self-doubt.
Pahanumdom man sini sa mga players nga sa tion sang ila nga hampang, panumdumon na sang mga ini nga sila ang champion na bangud madamo na sila sang hampang nga gindaog antes makalab-ot sa regional meet.
Suno pa sang gobernador ang mga mangin madinalag-on sa regional meet ang magarepresentar sang nagaisa nga Western Visayas sa Palarong Pambansa.
Ginpasiguro man ni Lacson nga magasuporta ini sa mga atleta bangud siya ang isa sa mga avid fans sang mga atleta.
Ginpasalamatan man ni Lacson ang tanan nga mga trainers, coaches kag pamilya sang mga atleta nga magahampang agud nga mahatagan sang dungog ang Western Visayas.
