Ginakondenar sang gobernador sa Negros Occidental ang paglampos sang bato sa tatlo ka mag-utod nga Bornales sa Hacienda Badiang, Brgy E. Lopez, Silay City, apang ini ang wala na nagdugang sang padya.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, wala na ini nagdugang sa P100,000 nga reward money bangod para sa iya ini ang nagakaigo na nga kantidad ilabi na nga may ara naman sang ginatutukan nga person of interest.
Nagasalig man ini sa ikasarang sang Silay City Police Station sa pagsolbar sa kaso.
Suno sa gobernador, sila ang mas magatutok sa pagbulig sa pamilya.
Nahibaluan nga magluwas sa 9 ka tuig nga babayi nga napatay, may duha ka mag-utod nga yara pa sa ospital kun sa diin isa sa ila ang kritikal ang kondisyon kag nagakinahanglan sang operasyon.
Nagakinahanglan naman sang AB positive nga blood type para sa 15 anyos nga biktima.
Ginatanyag sang gobernador ang bulig sang Philippine Red Cross kag Negros First Provincial Blood Center para sa kinahanglanon nga dugo sang pasyente.
