Liwat naman nga napuog sang aso ang downtown area sa ciudad sang Bacolod bangud sa nagluntad nga grassfire malapit sa Bredco Port sa nasakupan sang Barangay 2, Bacolod City kahapon, Marso 18.
Sa interview sang Bombo Radyo Bacolod kay Fire Officer 2 Rolin Paulan, Acting Chief Fire Investigator sang Bacolod Fire Station, nagdangat sa tatlo ka ektariyas ukon 30,000 square meters ang kalaparon sang grassfire nga nagluntad sa bahin sang Bredco port.
Suno kay Paulan, ang lugar kun sa diin nagluntad ang malapad nga grassfire kahapon sang hapon, ang pareho man nga lugar kun sa diin nagluntad ang grassfire sang tinalikdan nga semana.
Suno diri, santo sa ila inisyal nga imbestigasyon, may yara sang human intervention ukon may nagpanutod ukon naghaboy sang upos sang sigarilyo nga gintunaan sang nagluntad nga grassfire.
Nagpanugyan si Paulan sa mga pumuluyo nga likawan ang pagpanutod ukon paghaboy sang upod sang sigarilyo bisan diin lang agud malikawan ang sunog.
Suno diri, ang madakpan kag mapamatud-an nga nagapatigayon sang illegal nga pagpangdabok sa mga basura ang mahimo pasakaan sang kaso sang Bureau of Fire Protection kag Department of Environment and Natural Resources sang paglapas sa RA 8749 Clean Air Act kag mahimo mapriso.
Sa data sang Bacolod Fire Station humalin sang Marso 1 ukon Marso 18, may yara na sila sang narecord nga 89 fire calls kun sa diin ginalakipan sang grassfire, rubbish fire kag katubuhan.
