Dismayado si Senator Cynthia Villar bangud wala gina-utilize sang Sugar Regulatory Administration ang pondo para sa sugar industry.
Sa interview sang Bombo Radyo kay Villar nga chairperson sang Senate committee on agriculture, ginpahayag sini nga santo sa Sugar Industry Development Act (SIDA) Law, may yara sang P2 billion nga pondo nga ginpain para sa development sang sugar industry kag pagbulig sa mga sugar farmers apang wala ini ginagamit sang SRA.
Suno sa senador, sa P2 billion nga budget, P300 million ang ginpain para sa improvement sang black farm; P300 million para sa mga facilities program; P300 million ang ipahulam sa mga local farmers; kag 5% ang para sa scholarship sang mga bata sang mga mangunguma apang wala ini gina-implementar sang SRA.
Suno sa iya, namangkot ini kun ngaa wala matandog ang kwarta nga ginpain para sa development sang sugar industry apang wala ini mahatagan sang maayo nga sabat.
Suno sa iya, kanugon kun indi ini mautilize bangud mabalik man lang gihapon sa gobyerno ang pondo.
Ginpahayag man ni Villar nga kun magpadayon ini, mas maayo nga maubra nalang sang sugar program ang Department of Agriculture kag isaylo diri ang pondo. Samtang,
Nagapati ang Tatak Kalamay nga dako ang epekto sang mataas nga production cost sa industriya sang kalamay.
Sa interview sang Bombo Radyo kay Jerard Joseph Sarosa, convenor sang Tatak Kalamay, nagapati ini nga nagataas ang production cost sa Pilipinas kag dako ang epekto sini sa industriya sang kalamay.
Suno kay Sarosa, isa ka factor ang logistics bangud mas dako ang gasto sa pagdala sang mga produkto halin sa Manila pakadto sa Bacolod ukon Cebu sangsa magasto kun ipadala ang mga ini sa Thailand ukon Vietnam.
Suno sa iya, P50 kada sako ang magasto kun ibyahe ang produkto halin Manila pakadto Thailand samtang nagadangat naman P80 tubtob P100 kada sako kun halin sa Manila pakadto sa Bacolod.
Gindugang man sini nga nagataas man ang finance cost kag fertilizer cost.
Suno kay Sarosa, kun magsarurot ang industriya sang kalamay, indi lang mga mangunguma ang maapektuhan kundi ang ekonomiya man sang pungsod.
Indi man sigurado si William Chua, convenor sang Tatak Kalamay, kun makahatag sang bulig ang gobyerno sa infrastructure bangud nagapati ini nga may kaangtanan diri ang problema sa logistics.
Suno kay Chua, indi man mabasol ang mga shipping companies kun mahal ang ila sukot bangud indi mechanized ang pungsod kag kulang sa infrastructure.
Suno sa iya, dako gid ang mabulig sa industriya kun magnubo ang cost sang logistics.
Ginpaathag man ni Chua nga wala sila nagapangayo sang subsidy kundi suporta sa infrastructure.
Nagakasubo man ini bangud halin sa P2 billion nga budget sang Sugarcane Industry Development Act (SIDA), nagnubo ini sa P500 million sa tuig 2020.
