BACOLOD CITY — Samo-samo nga emosyon ang ginabatyag sa karun sang ginang nga nagpadako kay Police Cadet Fritz John Vallador nga magagradwar subong nga adlaw bilang valedictorian sang Philippine National Police Academy (PNPA) Class 2018.
Suno kay Nelia Deocares, excited ini, proud kag subong man nagakahadlok para kay Fritz John nga magapamuno sa iya nga klase sa ila nga graduation ceremony sa Silang, Cavite sini nga aga.
Suno kay Deocares, nagakahadlok ini bangud nga may mandato na si PNP Police Director General Ronald “Bato” Dela Rosa nga pagkatapos sang graduation maga-training na ini agud nga magsulod sa Special Action Force (SAF).
Ginpaathag sang ginang nga nagakahadlok ini para sa kadete bangud sang natabo sa SAF 44.
Upod ni Nelia ang iya bana nga si Edwin kag isa nila ka bata, ang mentor ni fritz John sa Bago City College kag isa man ka utod sini para sa graduation ceremony.
Wala pa napiho sang ginang kun anu ang iban nga schedule ni Vallador pagkatapos sang graduation apang sigurado nga magapauli ini sa Negros Occidental sa Marso 25.
Samtang nagapanugyan naman si Deocares sa mga kabataan kaangay ni Vallador nga nagdako nga wala nakilala ang amay nga indi ini paglantawon nga kadulaan.
