Patay ang gwardiya matapos nga ginluthang sang wala nahibaluan nga suspetsado sa corner Locsin-Luzuriaga Street, Bacolod City, kagab-i, alas- 6:30 sang gab-i.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, ang biktima ang ginkilala nga si Benjie Flores Fajardo, 30 anyos, residente sang Barangay Banago, Bacolod City, kag nagatrabaho bilang reliever nga gwardya sa balaligyaan nga ADZ.
Samtang nagapanglakaton papauli, may nagpundo nga motorsiklo sa tupad ni Fajardo, kag may nanaog nga tawo.
Gilayon na lamang nga gintiro sang tawo si Fajardo sang pila ka beses nga gintunaan sang kamatayon sini.
May nabilin naman nga empty cartridges sang cal 9mm sa area.
Samtang suno naman sa kay Metoy nga kaupod ni Benjie Flores Fajardo sa trabaho, isa ka bulan niya pa lamang nakilala si Fajardo bangod nga reliver lamang ini.
Suno kay Metoy kahapon, nakita sini nga may gina-esturya si Fajardo sa cellphone kun sa diin may yara sang argumento sa ila sang iya gina-esturya.
Ginapatihan naman nga nakabaton sang pagpamahog sa kabuhi si Fajardo.
