Dako ang pagpasalamat sang Central Negros Electric Cooperative sa pagbulig sang Negros Electric and Power Corp bisan nga ginapaabot pa lamang ang ila nga prangkisa.
Sa interview sang Bombo Radyo Bacolod kay CENECO General Manager Atty Arnel Lapore, ginalauman sini nga mapirmahan ni President Ferdinand ‘Bongbong’ Marcos jr ang prangkisa sang NEPC sa Agosto 1, 2024.
Suno diri, apisar nga wala pa ang perma sang presidente, nag-umpisa na ang NEPC sa pagpadala sang ila anum ka set sang team nga nag-upod sa CENECO sa pag-address sa mga power interruptions kasubong man sa preventive maintenance.
Nakahatag naman ang NEPC sang ayuda sa pag-maintain sa mga substations, kaangay na lamang sang Reclamation kag Burgos substation.
Sa karun, yara na ang CENECO sa process sa pagturn-over sa mga memorandum receipts kag mga items kasubong man nga ginatapos na ang mag reports kag mga ulubrahon nga dapat tapuson.
Samtang, magapabilin naman bilang CENECO General Manager si Lapore, matapos nga gin-extend sang National Electrification Administration (NEA) ang iya nga appointment sa anum ka bulan.
Suno kay Lapore, iya siguraduhon nga matapos ang tanan nga buluhaton sa CENECO para sa transition kag masiguro nga mahatag sa mga member consumers ang 30 percent ni CENECO gikan sa NEPC.
Mensahe ni Lapore, CENECO man ukon NEPC, magkaangay lamang ang luyag sang duha nga mahatag ang efficient kag effective nga serbisyo.
