Ginhatagan pagtamod sa session sang Sangguniang Panlalawigan sang nagligad nga semana ang hangyo sang mga real property owners sa Negros Occidental nga tax relief bangud sa epekto sang COVID-19 pandemic.
Sa interview sang Bombo Radyo kay Board Member Rommel Debulgado, chairman sang Committee on Finance sa SP, ginpahayag sini nga santo sa rekord sang Provincial Treasurer, may kapin P2.8 billion pa nga sulukton ang probinsya sa mga real property owners.
Apang bangud sa epekto sang pandemic sa ekonomiya, nagahangyo sang tax relief ang mga real property owners kag ini ang ila gintalikay sa nagligad sang session sang SP.
Suno diri, nalakip sa proposal sang tax relief program nga 20% ang ila pagabayaran nga real property tax sa gobyerno samtang ang nabilin nga 80% naman ang ila bayaran sa sulod sang duha ka tuig kag wala sang dugang nga charges.
Nagapati si Debulgado nga nagakadapat lang nga hatagan sila sang tax relief bangud mas maayo na lang ini sang sa tax amnesty.
Iya naman gin-athag nga kun ini ang maaprubahan, ang mga banwa lang sa probinsya ang makabenepisyo kag wala diri nalakip ang mga ciudad.
Ginalauman nga madihon ang nasambit nga programa sa ikaduha nga quarter sang tuig 2021.
