BACOLOD CITY – Igalubong sa maabot nga Sabado, Abril 29, ang isa sa mga katapo sang 47th Infantry Battalion sang Philippine Army nga napatay sa engkwentro sa tunga sang militar kag kapulisan kag Abu Sayyaf Group (ASG) sa Inabanga, Bohol sang tinalikdan nga Abril 11.
Ini ang ginkumpirmar ni Janet Espinosa Cajaban, ang balo ni Corporal Meljun Cajaban, assigned sa 47th IB kag napatay sa isa lamang kaigo sang bala sa iya nga ulo.
Sa exclusive interview sang Bombo Radyo kay Janet, 31-anyos kag isa ka elementary school teacher sa ciudad sang Kabankalan, gintalana sa las-10:00 sa aga ang misa sang paglubong sa iya nga mister.
Sa karon, yara na sa ila puluy-an sa Barangay Villamonte, ciudad sang Bacolod ang bangkay sang 29-anyos nga si Cpl. Cajaban matapos ini nag-abot gikan sa Pandan, banwa sang Leon, probinsiya sang Iloilo, nga lugar sang ginikanan sini.
Nailo sang suldado ang iya asawa kag duha ka mga kabataan nga nagaedad pa lamang sang duha ka tuig ang lalaki kag duha ka bulan ang babayi.
Samtang, ginsaysay sini nga ulihi sila nakaistoryahanay nga mag-asawa sadtong Abril 10, gab-i antes natabo ang engkwentro, kag ila ginaplanuhan ang pag-file sang furlough ni Cpl. Cajaban para sa dungan nga pagsaulog sang birthday kag bunyag sang duha nila ka mga anak.
