Yara na sa advanced state of decomposition ang lawas sang 43-anyos nga iloy nga nalumos sa suba sa Purok Crossing Libertad, Brgy Ma-ao, Bago City sang Agosto 29 sang ini ang nasapwan kahapon.
Madumduman nga una nga naanod sang daludo sang tubig ang 11 anyos nga bata nga babayi nga ginkilala kay Ma. Ella Gargasiran matapos nga maanod sa suba ang iya nga tsinelas samtang gintinguhaan naman ini nga masalbar sang iloy sini nga si Myra Gargasiran apang parehas ang mga ini nga gin-anod bangod sa mabaskog nga current.
Narecover ang bangkay ni Ma. Ella matapos ang pila ka oras apang wala na sang kabuhi.
Sa interview sang Bombo Radyo kay Police Staff Sergeant Erwin Jamandre, imbestigador sang Bago City Police Station, alas 4:30 kahapon sang nasapwan ang bangkay ni Myra sa higad sang suba sa Purok Bagong Silang, Barangay Ma-ao, 15 ka kilometros nagikan sa iya gin-anuran.
Suno kay Jamandre, nagpadulong sa suba si Romi Carismo agud kuntani kuhaon ang iya karbaw nga ginpatubog apang nakit-an sini nga may daw nagalutaw nga bagay sa suba kag sang iya ginpalapitan, didto sini nakit-an nga ini ang isa ka bangkay.
Siya ang nangayo sang bulig sa mga opisyales sang barangay kag sang ginrespondehan, ila nakumpirmar nga ini si Myra.// Gindala naman ang bangkay sang biktima sa punerarya agud mahatagan sang nagakaigo nga paglubong.
