Ginpaidalom sa red alert status ang probinsya sang Negros Oriental kasunod sang serye sang pagpamatay sa sunod-sunod nga mga inadlaw.
Sa sulod sang duha ka semana, 14 na ang kabug-usan nga patay bangud sa pagpangluthang sa amo nga probinsya.
Kahapon, pito tanan ka mga tawo ang ginpatay kag duha ang pilason sa shooting incidents nga nagluntad sa nagkalain-lain nga bahin sang Negros Oriental.
Una diri ang mag-utod nga Aradale Bayawa, chief sang Curriculum Implementation Division sang DepEd Division of Guihulngan City; kag Arthur Bayawa, assistant principal sang Guihulngan National High School – Special Science Department.
Ang duha ka DepEd officials ang ginpatay sang armado nga mga lalaki sa sulod mismo sang ila balay sa Barangay Hibaiyo, Guihulngan City, alas-12:30 kahapon sang kaagahon.
Makaligad ang isa ka oras, ginpatay naman sang armado nga mga lalaki si Punong Barangay Romeo Alipan sa ila man nga balay sa Barangay Poblacion, Guihulngan City.
Si Alipan ang punong barangay sang Buenavista apang may balay ini sa Poblacion sa diin siya ginpatay.
Alas-8:30 sang aga, gintiro naman si Raklin Astorias sa Barangay Maloh, Siaton, Negros Oriental.
Nagasakay sa motorsiklo ang duha ka mga suspetsado nga nagpatay kay Astorias kag wala pa nadakpan sang mga pulis tubtub subong.
Alas-5:10 sang hapon, patay man ang 50-anyos nga si Reden Eleuterio matapos gintiro sa Brgy. Tampucon II, Ayungon, Negros Oriental.
Nagasakay ang biktima sa motorsiklo sang ini ang gintiro sang mga suspetsado nga nagapabilin man nga at-large tubtub subong.
Pasado alas-8:00 kagab-i, patay naman ang mag-amay samtang pilason ang misis matapos gintiro sa Sitio Tara, Brgy. San Jose, Sta Catalina, Negros Oriental.
Ginapahayag nga ginsulod sa ila balay ang pamilya Ocampo kag ginpangluthang.
Patay si Marlon Ocampo kag isa niya ka anak nga si Marjune samtang pilason naman ang iya misis.
Wala pa natumod ang mga suspetsado sa krimen.
