Ginpangunahan ni Department of the Interior and Local Government Secretary Ismael ‘Mike’ Sueno ang inagurasyon sang taytay nga magakonekta sang city proper sang Kabankalan sa mga kabarangayan.
Suno kay Kabankalan City Mayor Isidro Zayco, ang taytay ang naga-angot sang ciudad kag sa mga barangay sang Tamudao, Linao, Kamansi kag Tampalon.
Ini ang ginpondohan sa idalom sang Presidential Bridge Program sang DILG kag counterpart sang city government sang Kabankalan.
Magluwas diri, gin-inagurahan man ni Sueno ang solar powered portable water supply development project sa Barangay Oringao nga ginpondohan sa idalom sang Bottom-up Budgeting (BUB) sang DILG.
Suno kay Zayco, makapila na ka beses na-reset ang inagurasyon sang amo nga mga proyekto tubtub nga ini ang natigayon kahapon.
Wala naman nalakip sa mga programa nga mahimo pondohan sang DILG ang airport nga ginaamat-amatan tukod sa amo nga ciudad.
Suno kay Zayco, yara na ini sa idalom sang Department of Transportation kag nakakadto naman diri ang mga tinawo sang ahensya agud magpahibalo sa ciudad nga may napain nga 30 milyones pesos para diri.
Gindugang pa sang alkalde nga magagmay lang anay nga eroplano ang ma-akomodar sang paluparan kun mahuman.
