Natalana nga pasakaan sang kaso ang isa ka incumbent councilor sang Moises Padilla, Negros Occidental nga gindakop may kaangtanan sa pag-ambush sa convoy ni Vice Mayor Ella Celestina Garcia-Yulo kahapon kun sa diin napatay ang iya utod kag hinablos.
Sa interview sang Bombo Radyo Bacolod kay Police Regional Office 6 director Brigadier General John Bulalacao, ginkumpirmar sini nga gindakop si Councilor Agustin ‘Nene’ Grande sa ila nga balay sa Barangay 1.
Kaupod ni Grande nga gindakop ang wala pa ginhingadlan nga persona.
Ini ang kasunod sang testimoniya sang mga witness nga nasiplatan si Grande sa Hacienda Dresden, Barangay Inolingan, pila ka minutos antes ang ambush kag ginapahayag nga kaistorya sini ang mga suspetsado.
Indi pa matumod kun isa si Grande sa mga nagtiro kay Councilor Michael Garcia kag tiyo sini nga si anay punong barangay Mark Garcia apang ginpasuni sang mga witness na kaupod sang konsehal ang mga suspetsado.
Suno sa PRO 6 director, indi mabudlay ang pagtumod sa mga suspetsado bangud may yara sang living witnesses nga personal man nga naistorya ni Bulalacao sa iya pagpadulong sa Moises Padilla.
Paathag ni Bulalacao, apat ka mga saksi ang iya naistorya kag nagtudlo kay Grande nga isa sa mga suspetsado.
Sa karon, yara sa kustodiya sang Moises Padilla Municipal Police Station ang konsehal.
Ginpasalig naman sang police regional director nga mahatagan sang due process si Grande.
