Ginpahayag ni Bacolod City Councilor Homer Bais nga dapat ang contractor sa Cell No. 4 sang Bacolod Sanitary Landfill ukon ang IPM Construction and Development Corporation amo ang magsabat hinali magdagdag sang penalties ang Environmental Management Bureau – Negros Island Region bangod sa lapses sa pagproseso sang Environmental Compliance Certificate (ECC).
Nahibaluan nga nag-issue sang notice of violation ang EMB-NIR matapos mahibaluan nga wala sang ECC ang pag-operate sang Cell No. 4.
Sa interview sang Bombo Radyo Bacolod kay Bais, nag amo ang chairperson sa Committee on Environment and Ecology sa Sangguniang Panlungsod, indi makaproseso sang ECC ang City Government para sa Cell No. 5 tubtob wala pa sang ECC ang Cell No. 4.
Panindugan sang konsehal nga nakita niya nga malawig man nga ginproseso sang anay pamunuan sang Bacolod Environment and Natural Resources Office ang permit, apang wala gid matapos.
Suno diri, ang conversion nagid lamang sang duta gikan sa ‘agricultural’ nga classification amo ang kulang.
Indi man nila mabasol ang EMB-NIR sa pag-issue sang notice of violation bangod may-ara gid man sang kapaslawan.
Apang pahanumdom ni Bais nga salabtun sang IPM inkaso may-ara sang idagdag nga penalidad bangod nakapagkit sa kontrata nila sa ciudad, kag sila ang ginabayaran man, nga ang mga ini ang magaproseso sang permits kag maga-operate sa landfill.
Sa pihak nga bahin, dapat nga masolbar naman ang mga reklamo kag masolusyunan na sa pag-operate sang Cell No 5 sang International Solid Waste Integrated Management Specialists, Inc.
Kalakip na diri ang reklamo sa pag-usbong sang baho sang sanitary landfill, kasubong man ang paghatag sang lain nga routa sa mga garbage truck agud indi na maglabay sa mayor nga dalanon sang Barangay Felisa.
