Nakabaton sang ‘Special Unit Award’ ang Kabankalan City Police Station kadungan sa 123rd Police Service Anniversary (PSA) Celebration sa Camp Crame, sa ‘most number of arrest on drugs’ category.
Sa interview sang Bombo Radyo Bacolod kay Police Col. Roberto Indiape, officer in charge sang Kabankalan City Police Station, ang ‘most number of arrest on drugs’ nga special award ang nabatun sini sang Agosto 8 kag ginhatag mismo ni President Ferdinand ‘Bongbong’ Marcos Jr.
Ini ang nakabase sa isa ka tuig nga accomplishment halin Abril 2023 tubtob Marso 2024 kun sa diin sila ang naka-aresto sang 91 ka drug personalities.
Ginakalipay ni Indiape nga sila ang nakabatun sang award gikan mismo sa Presidente, samtang magluwas sa Kabankalan City Police Station, may duha man ka nahatagan sang individual awards sa Police Regional Office 6.
Paathag ni Indiape nga sila ang wala nagalagas sang reward kundi padayun gid lamang nga magaseguro sang kalinong kag katawhayan sa ciudad, pinaagi sa pagpapas sang illegal nga droga.
Mensahe naman sini sa iya mga personnel nga apisar sa kabudlayan, magpadayun lamang sa paghatag sang dekalidad nga serbisyo.// Pahanumdom lamang sini nga updan sang pangamuyo ang kada adlaw nga pagtrabaho.
Pasalig man sini sa pumuluyo nga sila ang mangin patas sa paghatag sang serbisyo.
