Ginalauman sang Bacolod City Election Officer nga mas dako nga boto ang mabatun sang mga kandidato sa 2025 Midterm Elections bangod sa dyutay nga numero sang aspirants.
Sa kabug-usan nagdangat lamang sa 37 ang mga nagfile sang Certificate of Candidacy sa Bacolod City.
Ini ang ginalakipan sang lima ka nagpapili bilang kongresista, duha sa pagka-alkalde, duha sa pagkabise-alkalde kag 28 sa pagkakonsehal.
Sa interview sang Bombo Radyo Bacolod kay Atty Revo Sorbito, magluwas sa Team Asenso kag Team El Cid, dyutay lamang ang nagfile nga mga independent candidate.Bangod dyutay lamang ang pilian, ginalauman na sini nga mas madamo ang boto nga makuha sang pila ka mga politiko sa 2025 Midterm Elections.
Antes sini, ang mga COC ang ipadala naman sa Comelec Central Office nga amo ang magadeterminar kun sin-o nga mga pangalan ang malakip sa balota.
Pahanumdom ni Sorbito sa mga aspirants nga tsekyaron ang website sang COMELEC kag lantawon kun husto ang nakapagkit nga mga impormasyon.
Ini bangod magakinahanglan pa sang separado nga petisyon kun may-ara sang correction kalakip na sa spelling sang pangalan.
Ang official list sang pangalan nga malakip sa balota ang ginalauman nga post man sa bulan sang Nobyembre.
