Personal grudge ang ginalantaw nga motibo sa pagluthang-patay kay Jestoni Sabare, tricycle driver kag miyembro sang Task Force Kasanag, sa atubang sa West Town Hotel, Barangay 12, alas 9:50 sang gab-i sang Hunyo 11.
Madumduman nga si Sabare ang ginpatay samtang nagapungko ini sa bangko sa Dalan San Juan, malapit lang sa Bacolod Police Station 1.
Sa interview sang Bombo Radyo Bacolod kay Police Major Ramel Sarona, station commander sang Bacolod Police Station 1, personal grudge ang ila ginalantaw nga motibo bangud pagkatapos sang insidente, nakamuno ang pariente sang biktima nga ginpaandaman ini ang iya tiyo nga maghalong.
Suno kay Sarona, posible nga may kontra si Sabare rason kun ngaa nakahambal sini ang iya nga tiyo.
Sa karun wala pa maistorya sang mga kapulisan ang ginaalegar nga tiyo sini.
Ila man ginatsekyar kun ano pa gid ang iban nga mga aktibidad ni Sabare magluwas sa pagkatricycle driver.
Wala pa sa karun sang person of interest ang kapulisan apang isa lamang ka suspetsado nga nagasakay sa motorsiklo ang nagluthang sa biktima santo sa ila imbestigasyon.
Gina-imbestigahan man kun may kaangtanan ang krimen sa una na nga insidente sang pagpaluthang sang Hunyo 8 sa Barangay 35, kun sa diin ang biktima amu si Jose Allan Braza, isa ka mekaniko.
Pagatsekyaron pa sang mga ini kun posible isa lamang ang suspetsado sa duha ka krimen.
