Naka heightened alert status ang Police Regional Office Negros Island Region (PRO NIR) sa pagpasiguro sang malinong kag matawhay nga rally sang pila ka mga drivers kag operators sa bug-os nga rehiyon.
Sa interview sang Bombo Radyo kay PLt Col Joem Malong, nakastanby ang kapulisan kag preparado naman ang ila safety measures para sa iban pa nga mga aktibidad nga patigayunon sa bug-os nga rehiyon.
Suno diri, 74 ka police vehicles ang nakastandby sa pila ka mga strategic areas agud maghatag sang Libreng Sakay sa mga apektado nga mga commuters agud nga masiguro nga makapadayon ang mga ini sa tagsa tagsa ka mga aktibidad adlaw adlaw kasunod sa transport strike nga ginpatigayon subong nga adlaw.
Suno diri, nagsugod na kaina sang aga ang pagpatigayon sang Libreng sakay kun sa diin ginklaro sini nga pwede gid kasakay ang sin-o man nga malabyan sang ila ruta.
Dugang pa, gina-monitor man sang mga kapulisan ang iban pa nga criminal actvities kaangay sang mga nagapamentaha kasunod sa pagpasaka sang produktong petrolyo.
Samtang, nagpalibot sang patrol vehicle ang Land Transportation Office – Negros Island Region agud magbulig sa paghatag sang Libreng Sakay sa mga nastranded nga pasahero.
Sa interview sang Bombo Radyo Bacolod kay LTO-NIR Director Jeck Conlu, sila ang nag-inspection sa North Terminal sa Bacolod City kaina sang aga agud mahibaluan ang kadamuon sang mga salakyan nga nagbyahe.
Ini may kaangtanan sa ginapatigayon nga nationwide transport strike.
Suno kay Conlu, bastante paman ang nakita nila nga nagabyahe nga salakyan, apang sila ang padayun nga nagamonitor inkaso nga may mag-untat byahe sa hapon.
Pahayag sini nga nabatun nila ang derektiba sa pagpatigayon sang Libreng Sakay Program kagab-i.
Kun sa diin tatlo ka patrol car ang ila nga ginapalibot agud magtsekyar sa kadamuon sang mga nagabyahe sa lain-lain nga routa.
Inkaso nga may makita nga mga stranded nga pasahero, ang mga ini ang ila man nga ginapasakay kag ginadul-ong sa destinasyon.
Apang, apat lamang ang maximum nga masakay nila sa isa ka salakyan.
Suno kay Conlu, tubtob bwas pa ang mando sa ila sa pagpatigayon sang Libreng Sakay, apang nagalaom ini nga wala naman sang mangin problema bwas bangod national holiday bilang selebrasyon sang Eid’l Fitr.
Ginalauman na sini nga dyutay lamang ang pasahero bangod wala sang klase ang mga estudyante kag may mga wala man sang trabaho.
Luwas sa tatlo ka patrol units nga gindeploy para sa Libreng Sakay sa Bacolod City, may isa man ka patrol unit nga gindeploy sa Dumaguete.
