Tatlo ang ginalantaw nga persons of interest angot sa pagluthang-patay sa House Keeping Employee sa isa ka mall sa North Capitol Road sa Brgy 6, Bacolod City kagab-i.
Ang biktima ang ginkilala nga si Raymond Dela Torre, residente sang Purok Mabuhay, Ma-ao Barrio, Bago City.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 2, nakasugilanon na nila ang pamilya kag mga katrabaho sang biktima.
Sa karun, ang pamilya sang biktima ang nakafocus sa pag-asikaso sang bangkay sini agud mahatagan sang nagakaigo nga paglubong.
Madumduman nga samtang breaktime, si Dela Torre ang hinali nga ginpalapitan sang gunman, gintawag nga “To!,” kag sang magbalikid gilayon nga ginluthang sa agtang.
Ginapahayag sang mga witness nga ang suspect ang nakahelmet kag nagasakay sa sniper nga motorsiklo.
Ginapakamaayo naman ni Tolentino nga bukas ang pamilya sa paghatag sang mga impormasyon nga mahimo makatumod sa motibo sa krimen.
Wala man ang mga ini sang masaway sa biktima kag wala man sang reported nga nakontra sa ila nga lugar.
Nahibaluan nga antes paman ginpatay, nakasugid na si Dela Torre sa iya pamilya kag katrabaho nga ini ang nakabatun sang death threat.
Ini ang ginalantaw nga may kaangtanan sa daan sini nga trabaho sa Bago City bangod ang biktima ang apat pa lamang ka bulan sa iya trabaho sa mall.
