Nag-umpisa na ang Ligtas Summer Vacation (SumVac) 2025 sang Philippine National Police.
Sa interview sang Bombo Radyo Bacolod kay Negros Occidental Police Provincial Office spokesperson Police Captain Judesses Catalogo, ang PNP ang nagapreparar na sang security implementation nationwide ilabi na nga malapit na lamang magtakop ang School Year 2024-2025.
Suno diri, sa summer vacation lauman man ang influx sang mga nagalagaw sa mga inland kag beach resorts kag iban pa nga lalagawan.
Bangod sini, ginhatagan na sang instruction ang tagsa ka hepe sang mga Police Stations sa nagkalainlain nga mga banwa kag ciudad sa pagdeploy sang mga kapulisan.
Nakadepende naman sa mga hepe ang assessment kasubong man sa koordinasyon sa Local Tourism Offices kun pila ang ipadala nga tawo depende sa influx sang mga nagabisita.
Pasalig sini nga ang papel sang mga kapulisan amo ang pagseguro sang kalinong kag katawhayan sa komunidad.
Magluwas sa mga vacation spots, may police assistance desk man nga ipahamtang sa mga transportation hubs.
Kalakip man nga bantayan ang mga simbahan ilabi na nga nagahilapit man ang Semana Santa.
Sa pihak nga may mga police deployment sa mga campaign activities kag pagbantay sa aktibidad sang Bulkan Kanlaon, pasalig ni Catalogo nga may nagakaigo pa nga police personnel para sa deployment sa Ligtas SumVac 2025.
Samtang, sila ang nagapost man sang mga pahanumdom sa ila social media pages, may kaangtanan sa mga pahanumdom sa mga aktibidad sa summer vacation.
Kalakip diri ang mga dapat dumdumon antes biyaan ang balay, mga fire safety tips, mga dapat tandaan antes ang pagtravel out of town kag may kaangtanan sa hinali nga pagsaka sang temperatura.
