Natumod na nga Epogon group ang nagpangawat sa balay sang isa ka Belgian national sa Villa Angela Subdivision, Barangay Villamonte, Bacolod City tinalikdan nga semana kun sa diin ila nga ginpatay ang tagbalay nga foreign national.
Sa interview sang Bombo Radyo kay Bacolod City Police Office City Direc tor Henry Biñas, ginpahayag sni nga nagapadayon ang ginapatigayon nga hot pursuit operations sa mga suspetsado sa pagpangawat sa Villa Angela Subdivision.
Suno kay Biñas, ginahulat na lamang sang mga kapulisan nga may yara sang madakpan nga may kahimuan sa krimen antes pa man magpasaka sang kaso.
May yara naman sang ginapreparar nga dokyumento ang mga pulis agud mapasakaan sang kaso ang mga responsable sa krimen.
Nagpangabay man ini sa mga pumuluyo nga sa tion nga may makita ukon mahibaluan nga may tinutuyo sa pagpangawat, ireport ini sa pinakamalapit nga police station.
Ginapasiguro man sini nga nagapaninguha man ang mga kapulisan agud nga masolbar ang kaso.
Samtang bangud sa nagadinamo nga wala nasolbar nga krimen sa syudad, ginaenganyo sang pinuno sang Task Force Kasanag ang mga miyembro sini nga magkooperar sa imbestigasyon.
Suno kay John Chiong, dapat mangin alerto sa tanan nga oras kag dapat nga tanan ang mangin obligado nga magbantay sang tagsa ka kaugalingon.
Ginpahayag man sini nga pulis na ang bahala sa imbestigasyon sang mga kaso bangud nagapati ini sa abilidad sang mga ini sa pagsolbar sang mga kaso.
Ginpahayag man ni Chiong nga apisar nga nagapangatubang ang pungsod sang pandemya, nagapadayun ang organisasyon sa pagtutok sa pag-obserbar sa mga ahensya sang gobyerno nga nagahimo sang anomaliya kag nagapadayun man ini sa paghimo sang katungdanan ilabi na nga partner na ini sang Anti Red Tape Authority sa Metro Manila.
