90 porsyento na ang nasolbar sang Victorias City Police Station sa kaso sang gina-alegar accidental firing nga gintunaan sang pagkamatay sang isa ka pulis kag isa ka sibilyan sa ciudad sang Victorias sang Disyembre 24.
Madumduman nga ginkilala ang mga biktima nga sanday Patrolman Jonel Lutao, 26-anyos sang Batus Brillantes, Brgy. 1, kag James Carl Sernal, 26 anyos sang Estrella Village, Brgy. 6 sang nasambit nga ciudad.
Sa interview sang Bombo Radyo kay Police Lt. Col. Mary Rose Pico, hepe sang Victorias City Police Station, ginkompirmar sini nga yara na sila sa 90% sa nasambit nga kaso bangud suno sa iya, may yara sang witness kahapon nga nakakita sang pagbutang sang armas ni Lutao sa iya nga baba nga nagapamatuod nga ginpatay sini ang iya kaugalingon.
Suno kay Pico, apisar nga circumstantial ang mga impormasyon, kun may yara na sang witness, mapamatud-an ang mga ini.
Suno sa iya, ginatutukan nila sa karun kun accidental gid man ang natabo nga pagluthang kay Sernal.
Subong nga adlaw suno sa hepe, dal-on ang armas sa Scene of the Crime Operatives (SOCO) crime laboratory para sa ballistic examination.
Gindugang niya man nga makuha man subong nga adlaw ang resulta sang paraffin test sang duha ka biktima kag duha ka mga abyan sini nga sanday Kelvin John Pedrajas kag Florence John Tianga nga ginakabig man nga persons of interest.
