Patay ang isa ka kilala nga basketball player sa Brgy Bata, ciudad sang Bacolod, kahapon, kapin alas- 5:40 sang hapon, matapos ini nga ginluthang.
Suno sa isa ka witness, ang biktima amo si Mark Robin Sison alyas ‘Jabbar’, kapin sa 38 anyos ang edad, kag residente sang nasambit nga lugar.
Suno diri, si Sison ang nagapungko sa likod nga bahin sang tricycle sang may napalapit sa iya nga persona nga nagasakay sa motorsiklo, nagasuksok sang helmet kag may tabon ang nawong.
Suno sa witness, ginluthang sang suspek si Sison kun sa diin tatlo ka lupok ang nabatian kag gilayon naman nga nalagyo sa area ang suspek.
Nakita man sini nga nag-agom sang igo sa dughan kag ulo si Sison.
Samtang, tuman naman ang kasubo sang pamilya sang biktima nga si Mark Robin Sison alyas ‘Jabbar’ sa natabo.
Suno sa bayaw sang biktima, nakibot na lamang ini sang ginhambalan sang iya mga bata nga ginluthang si Sison.
Suno diri, nagafocus lamang sa pamilya ang iya bayaw kag nakita sini kun ano sini ka palangga ang iya mga bata.
Dako man ang palamangkotanon sa ila kun ngaa natabo ini sa iya bayaw bangod nga mabuot nga klase sang tawo ang pagkakilala sini sa iya.
