Ginpili sang newly weds nga sanday Kiray Celis kag Stephan Estopia ang resort nga Amanpulo para sa ila nga una nga trip bilang mag-asawa.
Ginkasal sila sang Disyembre 13 sa Shrine of St.Therese at Newport, Pasay City kaupod ang ila mga himata, abyan, kag mga sikat nga personalidad bilang principal sponsors lakip na diri sanday Vice Ganda, Dingdong Dantes, Senator Bong Go, Mayor Isko Moreno, kag Governor Chavit Singson.
Wala magdugay matapos ang seremonya, nagpadulong ang duha sa nasambit nga destinasyon nga kilala sa matin-aw nga tubig kag puti nga balas.
Ang lugar ang kilala man nga isa sa pinaka-exclusive kag pinakamahal nga resort diri sa Pilipinas bangud nagadangat sa kapin P80,000 tubtob P200,000 ang balor sa isa ka gab-i lamang.
Gin-share sang aktres ang pila ka highlights sang ila honeymoon sa iya social media account.
Sa iya nga post makit-an ang matahum nga mga litrato sang baybayon kag malinong nga dagat, kag ang beach vehicle nga gin-dekorahan sang “Just Married” para sa pag-welcome sang newlywed sa isla.
