Ginkalipay sang kongresista sa ciudad sang Bacolod ang pag-aprubar sang senado sa 3rd and final reading sang Bill No. 2507, ukon Negros Island Region Act nga nagaduso nga mangin isa ka rehiyon ang isla.
Sa interview sang Bombo Radyo Bacolod kay Bacolod City Lone District Congressman Greg Gasataya, nagapasalamat ini kay Senate President Juan Miguel Zubiri, Senator JV Ejercito kag 22 nga mga senador nga nagcommit kag nagboto para sa pag-aprubar sang nasambit nga hagna.
Suno kay Gasataya, matapos nga gin-aprubahan sang senado ang hagna, may yara ang presidente sang 30 ka adlaw nga i-veto ukon pirmahan agud nga mangin layi ang hagna apang kun wala siya sang himuon sa sulod sang natalana nga tion, mangin layi ang Bill No. 2507 ukon Negros Island Region Act pagkaligad sang 30 ka adlaw.
Ginkalipay man sini ang pag-aprubar sang hagna sa senado bangud nagbunga na ang pagpangabudlay sang mga kongresista, senador kag tanan nga naghatag sang suporta agud nga mapasar ang hagna sa kongreso kasubong man sa senado.
Bangud na-aprubahan na ang hagna, indi na mabudlayan ang mga pumuluyo nga magproseso sang mga dokyumento bangud may yara na sang pagatukuron nga opisina ang mga national agencies sa rehiyon.
Suno sa kongresista, madula naman ang political division sa tion nga mangin layi na ang Bill No. 2507 ukon Negros Island Region Act.
Suno kay Gasataya, kinahanglan man nga mapainan sang pondo ang pagpatuman sang Negros Island Region Act sa tion nga mangin layi na bangud bisan layi na ang hagna kun wala sang budget mangin kanugon lang.
Ginpasalamatan ni Gasataya ang tanan nga naghimo sang ila masarangan agud nga matuman ang madugay na nga ginahulat sang mga pumuluyo sa ciudad sang Bacolod kag probinsya sang Negros Occidental.
