Arestado ang isa ka persona matapos nga magpalupok sang armas-luthang sa Barangay 35, Bacolod City kahapon sang hapon.
Ginkilala ang nadakpan kay Niño Castro alyas Niño, 33 anyos, single, wala sang trabaho kag residente sang Prk. Sunrise, Doña Juliana, Brgy. Taculing, Bacolod City.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, nagpadulong ang mga ini sa Purok Mahiliugyon, Barangay 35, Bacolod City agud kuntani nga magpatigayon sang drug buybust operation sa mga drug personalities sa lugar.
Suno kay Depasucat, sang nagapadulong ang operatiba ginpalupkan na sang suspek sang armas-luthang sini ang pulis kag gilayon nga nagpalagyo.
Suno kay Depasucat, ginlagas man sang mga police ang suspek kag nagtabok ini sa Barangay Sincang-Airport kag nagsulod sa isa ka balay agud manago kun sa diin nagapuyo ang isa ka Person With Disability.
Wala man sang mga ini gilayon nga ginsulod ang balay agud nga indi man paghimuan sang malain sang suspek ang nagaestar sa balay.
Gincordon nila ang lugar kag gintawgan nila si Police Lt. Col. Sherlock Gabana kun sa diin gin-negosyar kag nagsungka man ang suspek.
Ang suspek ang nakailis naman sang ini ang nagsungka kag ang bayo sini nga may dugo kag basa ang ginbilin naman sa nasambit nga balay.
Mahimo nga nahulog ini sa creek sang ini ang ginlagas sang police.
Narecover diri ang isa ka cal .45 firearm nga may serial number 500798 kag magazine nga may unod nga pito ka bala.
Nadakpan na ini sadtong 2019 sa paglapas sa RA 9165 ukon Comprehensive Dangerous Drugs Act of 2002.
Sa karun ang suspek ang mangatubang sang kaso nga paglapas sa RA 10591 in relation to COMELEC GUN BAN kag Grave Threat.
