May mga tawo nga mahilig gid nga magpakuno-kuno agud makapamintaha sa iban.
Kaangay lamang sang lalaki sa India nga gin-aresto sang mga otoridad matapos nagtukod sang embassy kag nagpakuno-kuno nga ambassador sang peke nga pungsod agud makapang-into sang investors.
Ang suspek amo si Harshvardhan Jain.
Ginbutang niya ang peke nga embahada sa isa ka bungalow sa Ghaziabad.
Agud mas makakumbinsi, nagpakuno-kuno ini nga manggaranon kag madamo sang impluwensya nga ambassador.
Naggamit ini sang peke nga dokumento, kag nagbutang pa sang flag sang gin-imbento nga pungsod kaangay sang “Ladonia”, “Poulva”, “Seborga” kag “Westarctica” sa gwa sang building.
Ginsulod sang Special Task Force (STF) sang Uttar Pradesh Police ang peke nga embahada kag naaresto si Jain.
Nakumpiskar diri ang apat ka salakyan nga may peke nga diplomatic number plates, mga peke nga “diplomatic passport” para sa 12 ka peke nga pungsod, mga peke nga logo sang mga pungsod, kag iban pa.
Sa subong, yara ini sa kustodiya sang pulis kag magapangatubang sang madamo nga kaso.
