Ang mga tawo ang may tagsa-tagsa ka abilidad kaangay lamang sang mga drug courier nga himuon ang tanan agud nga matransport ang illegal nga druga.
Kaangay lamang sa Colombia bangud indi kuto kundi 19 ka cocaine capsules ang nakita sang mga otoridad sa ginasuksok sini nga wig ukon peluka sang isa ka lalaki nga naintercept sa airport sa Cartagena, Colombia.
Sa report, makita sa video nga amat-amat nga gingunting sang mga otoridad ang peluka sang lalaki.
Suno sa Cartagena Metropolitan Police, padulong kuntani sa Amsterdam ang suspek nga Columbian sang maintercept siya sa airport.
Nakumpiskar sa lalaki ang 19 nga capsule nga may kabug-aton nga masobra sa 200 gramos sang cocaine nga may balor nga 10,000 euros ukon P600,000.
Yara na sa kustodiya sang Attorney General’s Office ang suspek, nga nagapangatubang sang reklamo nga trafficking, manufacturing kag possession of narcotics substances.
