Bilang tawo kun kaisa makabatyag kita nga daw wala na sang pagpalangga ang atun pamilya sa atun.
Pinasahi ang ginhimo sang isa ka content creator sa pungsod Belgium bangud ginpeke sini ang iya kamatayon agud mahibaluan kun bala may nagapalangga man sa iya.
Ginkilala ang lalaki kay David Baerten ukon mas kilala sa social media bilang si Ragnar le Fou kun sa diin kaupod sini nga nag set-up sang amo nga prank ang iya asawa kag anak kag sila man mismo ang nagpalapta sa social media hanungod sa peke nga pagkamatay sini.
Bangud sini, gintambungan ang nasambit nga peke nga lubong sang masobra isa ka dosena nga mga indibidwal kag samtang nagakasubo ang mga tawo, naghugpa ang isa ka helicopter nga ginkakibot man sang kadam-an bangud nakita nila si David.
Gintamyaw pa ini niya suno diri ang mga tawo sang ‘Welcome to my Funeral” kung sa diin nanari-sari nga mga reaksyon ang iya nabaton.
Gin-athag man sini nga ginhimo niya ang amo nga prank indi agud makakuha sang kwarta ang content, kundi agud magaserbe nga mensahe sa kadam-an nga indi na paghulaton nga mapatay pa ang isa ka tawo agud liwat ipakita nga palangga nila ini.
