Ginapanawagan sang station commander sang Bacolod Police Station 2 sa may yara sang kilala ukon nadula nga mga himata nga makig-angot sa ila nga estasyon.
Ini matapos nga may nasapwan nga isa ka lalaki nga wala na sang kabuhi sa BREDCO Port Seawall, Purok Cambodia, sa likod sang Moreta Cargo, Barangay 2, Bacolod City, kaina sang aga, Nobyembre 17, 2025.
Sa interview sang Bombo Radyo Bacolod kay Police Major Eugene Tolentino, sila ang gintawgan sang katapo sang Mobile Force Company nga na-assign sa Lampirong border agud nga magpahibalo nga may yara sang nasapwan nga bangkay sang isa ka lalaki nga nagalutaw-lutaw sa nasambit nga lugar.
Ang lalaki ang wala sang pang-ibabaw nga panapton kag nakasuksok sang maong nga delargo.
Suno kay Tolentino, ginpadulungan sang mga kapulisan kag sang team nagikan sa Bacolod City Disaster Risk Reduction Management Office (DRRMO) ang lugar sang insidente kun sa diin gindeklarar nga wala na sang kabuhi.
Gindala ang bangkay sa ABE Funeral Homes.
Suno sa station commander ang bangkay ang wala pa sang identity bangud indi man ini kilala sa lugar kag wala man sang reported nga missing person sa Barangay 2.
Ang lalaki ang may pilas sa ulo nga ginalantaw nga nakabunggo ini sa bato.
Ginalantaw man nga wala lamang ini madugay nga nalumos sang ini ang nasapwan bangud indi pa bloated ang lawas.
Sa kun sin-o man ang nadulaan sang himata ukon mga nakilala nga missing makig-angot lamang sa Bacolod Police Station 2 agud nga mabuligan nga matumod ang nasapwan nga persona sa nasambit nga lugar.
