Arestado ang 26 anyos nga lalaki matapos makuhaan sang armas-luthang kag suspected shabu sa Barangay Calong-Calong Zone 1, Barangay Singcang-Airport, Bacolod City sang Domingo.
Ginkilala ang nadakpan kay Kyle Bryan Carsigo kag residente sang Purok 1, Magsungay, Barangay Singcang-Airport, ciudad sang Bacolod.
Sa interview sang Bombo Radyo Bacolod kay Police Captain Greeky Cayao, station commander sang Bacolod Police Station 8, may yara sang nagreport sa ila estasyon nga may yara sang nakatuga sang alarma matapos nga makita ang isa ka persona ang may yara sang armas-luthang.
Suno kay Cayao, natimingan man nga may yara sang mga personnel ang Bacolod Police Station 8 nga yara sa lugar bangud may ginamonitor man.
Gilayon man ang mga ini nga nagresponde kag naaktuhan ang isa ka tawo nga may armas-luthang.
Suno sa station commander, nakuha sa paghinakop sang suspetsado ang KG-9 kag isa ka sachet sang gina-alegar druga.
Nakahunong na si Carsigo sa Bacolod Police Station 8 kag magapangatubang sang kaso nga paglapas sa RA 10591 ukon Comprehensive Firearms and Ammunition Regulation Act kag RA 9165 ukon Comprehensive Dangerous Drugs Act of 2002.
