Padayon pa nga ginapangita sang mga kapulisan ang Barangay Tanod nga suspect sa pagpangluthang-pataykadungan sa kapiyestahan sa Barangay Inayawan, Cauayan, Negros Occidental sang Lunes sang kaagahon.
Sa interview sang Bombo Radyo Bacolod kay Police Lt. Col Lowell Garinganao, hepe sang Cauayan Municipal Police Station, sa imbestigasyon nagluntad ang shooting incident sa Sitio Caballohan, Purok 11, Barangay Inayawan kun sa diin una nga nagpalupok sang iya armas luthang sa kahawaan si Elson Sabordo kag nasalabat sang bala si Julieta Aninion.
Gin-agaw naman ni Barangay Tanod Rafael De Asis ang armas-luthang ni Sabordo kag gintiro ini sang makapila ka beses nga nagresulta sa gilayon nga kamatayon.
Suno kay Garinganao, si Aninion nga nakaagom sang pilas sa natuo nga kamot matapos nga nasalabat sang bala, ang nakagwa na sa ospital sa ciudad sang Kabankalan.
Samtang si De Asis naman ang padayon nga ginapangita sang mga kapulisan.
Suno sa hepe nagatipon na ang mga ini sang statements nagikan sa mga witnesses kag ginahikot naman ang mga papeles agud nga mapasaka ang kaso nga homicide batok sa Barangay Tanod.
Narecover naman sa crime scene ang pito tanan ka empty cartridges sang .45 caliber pistol.
