Patay ang 22 anyos nga lalaki matapos nga ginbuno sang isa sa duha nga nakaaway sini sa Crossing Central, Barangay Purisima, Manapla, Negros Occidental gamit ang bala sang indian pana.
Ang biktima ang ginkilala kay Emil Melgar, 22 anyos kag residente sa nasambit nga lugar; samtang ang mga suspetsado naman nga magapangatubang sang kaso nga homicide ang ginkilala kanday Elmar Nueva, 18 anyos, single kag Jhon Michael Becera lunsay mga residente sa nasambit nga lugar.
Suno kay P/Maj. Joevito Bose, hepe sang Manapla Municipal Police Station, nagsugat ang biktima sa live-in partner sini kaupod ang iya nga manghod kag nakita sini nga kaupod sang iya live-in partner ang duha ka mga suspetsado.
Sang gindala ni Melgar ang iya live-in partner, nabatian sini nga nagpahayag ang isa sa suspetsado nga daw kaangay nga mabato pa ini sa ila.
Suno sa hepe, ginalantaw nga bangod sa ego, nagbalik ang biktima kag ginkumpronta ang duha tubtob sa nagdangat sa bundakanay.
Apang hinali nalang nga naghunos sang bala sang indian pana si Nueva kag ginbuno si Melgar sa nawala nga bahin sang likod.
Ginhingagaw naman dala sa ang biktima sa Dr. Ramon Gustilo Hospital sa banwa sang Manapla para sa pagbulong, tubtob sa gintransfer sa Teresita Lopez Jalandoni Provincial Hospital sa Talisay City apang gindeklarar na ini nga dead on arrival takna alas-12:30 sang kaagahon.
Suno kay Bose, nadakop naman gilayon sang mga kapulisan si Becera apang si Nueva ang nakapalagyo apang nadakpan man ini kasunod sang ginpatighayon nga follow up operations kag ang mga ini ang nakahunong na sa Manapla Muinicipal Police Station.
Ginalantaw naman sa karun sang mga kapulisan kun madugay na nga may dumot ang mga suspetsado sa biktima, kasubong man ang angulo nga love triangle.
