Nagdangat sa balor P884,000 ang nakumpiskar nga suspected shabu gikan sa lider sang Bugalon Drug Group kag isa pa sini ka kaupod sa drug buybust operation nga ginpatigayon sa Purok Paraiso, Barangay Hilamonan, Kabankalan City, Negros Occidental.
Ang mga suspetsado ang ginkilala kanday Jonalyn Bugalon alyas Mommy Jing, 49 anyos, leader sa Bugalon Drug Group, wala sang trabaho kag residente sa nasambit nga lugar; kasubong man si Juanito Artisano Jr alyas Jerome, isa ka beautician kag residente sa Purok Riverside, Barangay Suay, Himamaylan City, Negros Occidental.
Ang subject sa operasyon nga lider sang Bugalon Drug Group ang ginakonsiderar naman nga High Value Individual (HVI).
Narecover sa paghinakop sang duha ang 13 ka sachet sang suspected shabu kag isa ka nakabugkos nga plastic nga naga-unod sang ginasuspetsuhan shabu nga ginabanta nagabug-at sang 130 gramos.
Ang mga suspetsado ang nakahunong na sa kustodiya sang Kabankalan City Police Station kag natalana magpangatubang sang nagakaigo nga kaso.
Kasunod sini, gindayaw man ni Negros Occidental Police Provincial Office (NOCPPO) Director P/Col. Leo Pamittan ang tropa sa dugang nga accomplishments sa pagpakigbato sa iligal nga droga.
