Nagpanawagan ang Food and Nutrition Research Institute – Department of Science and Technology (FNRI-DOST) sa publiko nga likawan ang pagbakal kag pagkonsumo sang buka nga itlog.
Sa interview sang Bombo Radyo Bacolod kay Victor Franco Alfonso, Science Research Specialist I sang FNRI-DOST, mas barato ang buka nga itlog apang mas dako naman ang gastuhon sa tion nga makakaon sang bacteria nagikan diri nga nagatuga sang food poisoning.
Ang itlog suno kay Alfonso ang ginatapikan sang salmonella bacteria sang naggwa ini sa manok gani kinahanglan nga mahugasan gid ini sang maayo antes lutuon.
Nagakadapat man suno sa iya nga lutuon sang husto ang itlog sa baylo nga malasado bangud heat-resistant ang salmonella ukon indi dali-dali nga mapatay sa mahina nga init.
Sa tion nga buka ukon may litik ang itlog, makontaminar ang salmonella nagikan sa aluka-it kag indi naman mahugasan.
Wala sang pili suno sa iya ang maapektuhan sang salmonella bangud bata man ukon adult ang vulnerable diri.
Apang bangud mahina ang immune system sang bata kag tigulang, sila ang mas susceptible.
