BACOLOD CITY — Linibo ka mga job order casuals sa mga ahensya sang gobyerno ang madulaan sang trabaho bangud sa pagbungkag sang Negros Island Region.
Nahibaluan nga sa Executive Order 38 ni Presidente Rodrigo Duterte, ginamanduan ang mga empleyado sa regional offices sa NIR nga magbalik sa orihinal nga deployment unit sa sulod sang 60 ka adlaw.
Sa Good Morning Philippines Program sang Bombo Radyo Bacolod, ginpahayag ni Dr. Ma. Lina Sanogal, coordinator sang Provincial Planning and Development Office, nga indi magnubo sa isa ka libo ang JOs sa nagkalain-lain nga ahensya nga nagsugod sang operasyon sang Enero tuig 2016 ang apektado sang pagka-dissolve sang NIR.
Ang mga regional offices ang nag-hire sang JOs bangud wala sang plantilla positions nga ginhatag sa rehiyon kadungan sang indi pag-angkon sang kaugalingon nga pondo.
Bangud diutay lang ang plantilla positions ukon ang nagikan sa Region 6 kag 7 nga ginsaylo diri, JOs ang kalabanan nga mga personnel agud nga mapun-an sang ahensya ang ila trabaho, magluwas lamang sa Philippine National Police kag Bureau of Fire Protection Region 18 nga nag-hire sang permanente kag bag-o nga mga tinawo.
