Natapos na sang Abril 7 ang pito ka adlaw nga lockdown nga ginpatuman sa banwa sang Toboso.
Sa interview sang Bombo Radyo Bacolod kay Toboso Mayor Richard Jaojoco, ginpahayag sini nga gin-dowgrade na nila sa enhanced community quarantine(ECQ) ang status sang ila nga banwa.
Bangud diri, mahimo na makagwa ang isa sa miyembro sang kada pamilya nga may yara sang home quarantine pass agud nga magbakal sang ila nga kinahanglanon.
Ginakabig ni Jaojoco nga madinalag-on ang lockdown nga ila gin-implementar bangud suno sa iya, wala sang may nakitaan sang flu-like symptoms sa iya mga residente sa sulod sang pito ka adlaw.
Ginpasalig man ni Jaojoco nga sa sini nga semana magahatag sila sang ikaduha nga hugnat sang foodpacks sa kada household.
Suno sa alkalde, kun mabaton na sang mga pumuluyo ang cash grant nagikan sa social amelioration program, ini anay ang ila gastuhon tubtob sa tunga-tunga sang Mayo.
Pagkatapos sina, posible nga maabot naman liwat ang ikaduha nga hugnat sang social amelioration program sa bulan sang Mayo, amo naman ina ang ila gastuhon tubtob sa tunga-tunga sang Hunyo.
Ginpasiguro man sini nga kun mag-abot ang bulan sang Hunyo nga wala pa nabalik sa normal ang sitwasyon, handa nga maghatag liwat sang ayuda ang banwa.
Suno sa alkalde, posible nga mahatag sila sang tag-isa ka sako sang bugas sa kada household agud gamiton para sa bulan sang Hunyo tubtob Hulyo.
Ginpasalig man sini ang iya pumuluyo nga nakahanda ang ila local government unit (LGU) sa pag-responde sa coronavirus tubtob sa masunod nga tatlo ka bulan bilang kabahin sang ila nga contingency plan.
