Patay ang isa ka lola matapos nga ginbuno sang iya apo sa SP Village, Barangay Pahanocoy, Bacolod City kaina sang aga, Pebrero 23, 2025.
Ginkilala ang biktima kay Erna Araiz, 66 anyos samtang ang suspek kay Jerian Araiz, 19 anyos kag residente sang nasambit nga lugar.
Sa exclusive interview sang Bombo Radyo sa utod sang suspek, naghulam sang cellphone ang ila iloy sa ila Lola apang wala nagpasugot ang biktima.
Dugang pa sini, nagluntad ang pagbinaisay sa tunga sang ila iloy kag sang ila Lola.
Bangud nagalungan ang suspek nagkuha ini sang patalom kag wala sang madamo nga estorya, ginbuno sini ang biktima.
Nakaagom sang pilas ang biktima kun sa diin gindala ini sa Corazon Locsin Montelibano Memorial Regional Hospital apang gindeklarar nga dead on arrival.
Dugang pa sang utod sang biktima, gin-alegar sini nga ginlantaw lamang sang suspek; sang iya iloy kag sang iya tiyo sang ang biktima ang nabun-an na.
Gin-alegar man sini nga mahimo ginpulihan pa sang tatlo buno ang ila lola kag dugang sa alegasyon sini nga nagagamit sang illegal nga druga ang iya iloy kag tiyo bangud makapila na niya ini madakpan kag nagahipos lamang ini.
Ginpahayag man sini nga indi na magpakita ang ila iloy sa ila bangud ipapriso nila ini.
Ang ila amay ang wala sang natabo ang pagpamuno sang ila magulang bangud nagatrabaho ini sa banwa sang Murcia, Negros Occidetal.
Samtang ginpahayag naman sang station commander sang Bacolod Police Station 8 nga nakahunong na sa nasambit nga police station ang suspek nga nagbuno-patay sa biktima.
Sa interview sang Bombo Radyo Bacolod kay Police Captain Greeky Cayao, station commander sang Bacolod City Police Station 8, santo sa ila imbestigasyon ang biktima ang ginbuno sang suspek nga wala sang damo nga estorya bangud gina-alegar ini nga may deperensya sa paminsaron ukon nagasuprer sang depression.
Suno kay Cayao, ginapaimbestigaran niya pa kun ano pa gid ang natabo antes nagluntad ang insidente sang pagpamuno.
Nakahunong sa Bacolod Police 8 ang suspek kag ginahulat nalang ang desisyon sang pamilya sang biktima kun magapasaka pa sang kaso batok sa suspek.
