Ginalibot sang Regional Director sang Land Transportation Franchising and Regulatory Board – Negros Island Region sa nagkalainlain nga mga bus terminals antes ang Semana Santa.
Sa interview sang Bombo Radyo Bacolod kay LTFRB-NIR Director Gerry Llena, ginapasalamatan sini ang bulig sang mga local government units sa pagmonitor sa mga terminals, ilabi na nga siya ang naga-isahanon pa lamang kag wala pa sang budget kag personnel ang LTFRB-NIR.
Nakahinun-anon naman ini sa Vallacar Transit Incorporated nga nagpasalig na nga inkaso kulangon ang mga nagabyahe nga bus units sa pagdagsa sang mga pasahero sa Semana Santa, sila ang magadeploy sang dugang nga bus units.
Si Llena ang random naman nga nagalibot sa nagkalainlain nga bus terminal sa Negros Occidental, Negros Oriental kag Siquijor.
Ginatsekyar sini ang kadamuon sang available nga mga bus units kag ang ila preparasyon sa Semana Santa.
Pasalig ni Llena nga humalin sang nagpungko ini sa pwesto, adbokasiya na niya nga maseguro ang safety kag comfort sang mga pasahero.
Ang nasambit nga adbokasiya man ang ginaseguro niya nga ginatuman sang mga bus operators.
Inkaso nga may-ara sang mga complaints tuhoy sa mga driver sang bus, panugyan sini nga magreport, agud mapatawag kag ma-imbestigaran ang driver.
