BACOLOD CITY — Wala pa nabalik ang linya sang National Grid Corporation of the Philippines (NGCP) nga nagaangot sang Luzon kag Visayas nga nabandog sang magluntad ang 6.5 magnitude nga linog sa Leyte sadtong Hulyo 6 sang hapon.
Ini ang ginpaalinton ni Michelle Vicera, ang information officer sang NGCP Western Visayas, sa exclusive interview sa Good Morning, Philippines Program sang Bombo Radyo Bacolod.
Suno kay Vicera, nagaangutay ang Luzon kag Visayas rason nga nagahatagay sang suplay sang enerhiya ang mga ini kun magkulang ang kuryente sa isa sa ila.
Apang bangud sa linog, nautod ang submarine cable nga nagaangot sa mga ini kag tubtob subong wala pa ini mabalik.
Sa pihak sini, suno kay Vicera, may bastante nga suplay sang kuryente sa bug-os nga Visayas bangud sang mga solar power plant diri.
Nagaangot man ang Negros kag Panay rason nga kun magkulang gid man sang enerhiya para sa mga Negrense, sarang makabulig ang mga planta sang kuryente sa isla sang Panay, paagi sa submarine cable sang NGCP.
Samtang, malapit na ma-restore ukon mabalik sa husto sini nga kondisyon ang mga transformers sang NGCP nga tuman nga naapektuhan sang 6.5 magnitude nga linog sa Leyte sadtong Hulyo 6.
Ginpahayag ni Vicera, magluwas sa mga power plants, nangin problemado man bangud sang linog ang mga transformers sang NGCP nga amo ang nagadul-ong sang kuryente sa madamo nga distribution utilities sa Region 8.
Suno kay Vicera, napilitan ang NGCP nga magpakuha sang duha ka transformers gikan sa Cebu padulong sa Ormoc agud mangin back-up sa mga nagkalaguba.
Sa karon, suno sa NGCP Information Officer, gikan sa anom nga nagkala-damage, lima na mga transformers ang na-energize kag sarang na maka-transmit sang bastante nga suplay sang kuryente sa electric cooperatives sa bug-os nga rehiyon.
Mangin ang transmission line ang nagagana naman sang husto.
Suno kay Vicera, nagapadayon naman ang restoratin sang mga power plants kun sa diin gikan sa kinaandan nga 500 megawatts nga gina-supply sang Leyte antes nagluntad ang linog, yara na sa 340 megawatts ang sarang sini nga ma-generate.
